नेपाली कम्युनिष्ट पार्टीले देशभरका उम्मेदवार सार्वजनिक गर्‍यो

काठमाडौं 

आगामी प्रतिनिधिसभा निर्वाचनका लागि नेपाली कम्युनिष्ट पार्टीले सातै प्रदेशका विभिन्न निर्वाचन क्षेत्रबाट उम्मेदवारहरूको नामावली सार्वजनिक गरेको छ। पार्टीले कोशीदेखि सुदूरपश्चिमसम्म १६५ निर्वाचन क्षेत्रमा उम्मेदवार टुंगो लगाएको जनाएको छ। 

कोशी प्रदेशअन्तर्गत ताप्लेजुङ, पाँचथर, इलाम, झापा, मोरङ, सुनसरी, उदयपुर, खोटाङलगायत जिल्लामा उम्मेदवार चयन गरिएको छ। ताप्लेजुङ–१ बाट खेलप्रसाद बुढाक्षेत्री, पाँचथर–१ बाट हर्कबहादुर नेम्वाङ, इलाम–१ बाट रणबहादुर राई तथा झापा–१ बाट अशेष घिमिरे उम्मेदवार रहेका छन्। 

मधेश प्रदेशमा सप्तरी, सिराहा, धनुषा, महोत्तरी, सर्लाही, रौतहट, बारा र पर्साका सबै निर्वाचन क्षेत्रमा उम्मेदवार घोषणा गरिएको छ। सप्तरी–१ बाट रविन्द्र चौधरी, सिराहा–१ बाट रामचन्द्र यादव, धनुषा–१ बाट मातृका प्रसाद यादव तथा महोत्तरी–१ बाट गिरिराजमणि पोख्रेल उम्मेदवार बनेका छन्। 

बागमती प्रदेशमा काठमाडौं उपत्यकाका सबै निर्वाचन क्षेत्रसहित भक्तपुर, ललितपुर, चितवन, धादिङ, नुवाकोट, काभ्रेपलान्चोक, सिन्धुपाल्चोक, मकवानपुर लगायत जिल्लामा उम्मेदवार तय गरिएको छ। काठमाडौं–१ बाट मेनका भण्डारी, काठमाडौं–५ बाट कल्पना शर्मा, भक्तपुर–१ बाट हरिराम लवजु तथा चितवन–२ बाट प्रताप गुरुङ उम्मेदवार रहेका छन्। 

गण्डकी प्रदेशमा गोरखा, कास्की, तनहुँ, स्याङ्जा, पर्वत, बागलुङ, म्याग्दी, मुस्ताङ, मनाङ र नवलपरासी (पूर्व) का क्षेत्रहरूमा उम्मेदवार खडा गरिएको छ। गोरखा–१ बाट हरिराज अधिकारी, कास्की–१ बाट राजकाजी गुरुड तथा तनहुँ–१ बाट विध्यानाथ ढकाल उम्मेदवार छन्। 

लुम्बिनी प्रदेशअन्तर्गत गुल्मी, पाल्पा, अर्घाखाँची, रुपन्देही, कपिलवस्तु, दाङ, बाँके, बर्दिया, रोल्पा, प्युठान तथा पूर्वी रुकुमका क्षेत्रमा उम्मेदवार सार्वजनिक गरिएको छ। पूर्वी रुकुम–१ बाट पुष्पकमल दाहाल ‘प्रचण्ड’, रोल्पा–१ बाट वर्षमान पुन तथा बाँके–१ बाट नरेन्द्र पाण्डे उम्मेदवार छन्। 

कर्णाली प्रदेशमा सल्यान, डोल्पा, मुगु, जुम्ला, कालिकोट, हुम्ला, जाजरकोट, दैलेख, सुर्खेत र पश्चिम रुकुमका क्षेत्रहरूमा उम्मेदवार तय गरिएको छ। कालिकोट–१ बाट महेन्द्रबहादुर शाही, जुम्ला–१ बाट नरेश भण्डारी र दैलेख–१ बाट अम्बरबहादुर थापा उम्मेदवार बनेका छन्। 

त्यस्तै, सुदूरपश्चिम प्रदेशमा बाजुरा, अछाम, बझाङ, डोटी, कैलाली, दार्चुला, बैतडी, डडेल्धुरा र कञ्चनपुरका निर्वाचन क्षेत्रमा उम्मेदवार घोषणा गरिएको छ। कैलाली–१ बाट रामलाल डगौरा थारु, डोटी–१ बाट त्रिलोचन भट्ट तथा कञ्चनपुर–१ बाट विना मगर उम्मेदवार रहेका छन्। 

पार्टीले समावेशिता, क्षेत्रीय प्रतिनिधित्व र अनुभवी नेतृत्वलाई प्राथमिकतामा राखेर उम्मेदवार छनोट गरिएको जनाएको छ। अब पार्टीले देशव्यापी चुनावी अभियान तीव्र पार्ने तयारी गरेको छ।