क्रिस्टियानो रोनाल्डो समयसँगै बदलिँदै अझै विश्व फुटबलमा राज गर्दै

क्रिस्टियानो रोनाल्डो केवल महान् फुटबलर मात्र होइनन्, समयसँगै आफूलाई परिवर्तन गर्दै अघि बढ्ने प्रेरणादायी खेलाडी पनि हुन् । मैदानमा उनको यात्रा संघर्ष, मेहनत, अनुशासन र निरन्तर सफलताको प्रतीक बनेको छ ।

सन् २००६ मा पहिलो पटक फिफा विश्वकप खेलेका रोनाल्डो अहिले पनि सन् २०२६ को विश्वकप खेल्ने लक्ष्यसहित तयारीमा छन् । करिअरको सुरुवातमा उनी तीव्र गतिमा ड्रिब्लिङ गर्ने खेलाडीका रूपमा परिचित थिए । विपक्षी खेलाडीलाई छक्याउँदै बल अगाडि बढाउने उनको शैली निकै आकर्षक मानिन्थ्यो । तर समयसँगै उनले आफ्नो खेल शैली परिवर्तन गर्दै आफूलाई विश्वकै घातक गोलकर्तामध्ये एकका रूपमा स्थापित गरे ।

टाढाबाट शक्तिशाली प्रहार गर्ने, फ्रिकिकमा उत्कृष्ट गोल गर्ने तथा हेडमार्फत निर्णायक गोल गर्न सक्ने क्षमता उनको विशेष पहिचान बन्यो । यही कारण उनी विश्व फुटबलका उत्कृष्ट खेलाडीसँग बराबरी प्रतिस्पर्धा गर्न सफल भए ।

म्यान्चेस्टर युनाइटेड मा रहँदा उनले क्लबलाई नौ वटा उपाधि जिताए । त्यसपछि सन् २००९ मा रियल म्याड्रिड पुगेपछि उनको करिअरले अझ उचाइ समात्यो । उनले घरेलु तथा युरोपियन प्रतियोगितामा लगातार गोल गर्दै पाँच फरक सिजनमा ५० भन्दा बढी गोल गर्ने कीर्तिमान बनाए ।

रियल म्याड्रिड छाड्दा उनी क्लब इतिहासकै सर्वाधिक गोलकर्ता बनेका थिए । उनले ४३८ खेलमा ४५० गोल गर्दै क्लबलाई १५ वटा उपाधि दिलाए ।

त्यसपछि उनले युभेन्ट्स मा तीन वर्ष बिताए, जहाँ टोलीलाई पाँच उपाधि जिताउन महत्वपूर्ण भूमिका खेले । पछि उनी पुनः म्यान्चेस्टर युनाइटेड फर्किए र करिब डेढ वर्ष टोलीका लागि खेले ।

हाल रोनाल्डो अल नासर बाट खेलिरहेका छन् । सन् २०२३ जनवरीदेखि साउदी प्रो लिगमा आबद्ध उनले सोही वर्ष क्लबलाई अरब क्लब च्याम्पियन्स कप जिताउन पनि महत्वपूर्ण योगदान दिएका थिए ।

उमेर बढ्दै जाँदा धेरै खेलाडीको प्रदर्शन कमजोर हुँदै जान्छ, तर रोनाल्डो भने अझै पनि फिटनेस, मेहनत र आत्मविश्वासका कारण विश्व फुटबलका चर्चित र प्रभावशाली खेलाडीमध्ये एकका रूपमा चिनिन्छन् ।